Luis Aurelio
(1916-1996)

D'Asturies y otros poemes

A Luis Aurelio Álvarez Martínez de Vega "naciéronlu" en Buenos Aires xusto cuando Europa tremaba baxo la Primer Guerra Mundial. Fíu de mierenses emigraos al Ríu la Plata a la gueta d'un meyor futuru, les señaldaes familiares nun tardaron n'espoxigar y al pocu la familia retornó al Mieres natal.

Estudió nel colexu "los Baberos" con toles reconocencies, y xusto nel momentu que diba coyer sitiu na Universidá, problemes económicos familiares fixéronlu, con quince años, trabayar de guaje na mina, daqué perimportante nel so camín personal y poéticu.

Al pocu algamó una beca que-y permitió dir a Madrid, onde escoyó les estayes de Comerciu y Llingües Modernes.

Nos años cuarenta surdieron publicaes en revistes y periódicos delles de les sos primeres poesíes.

En llingua asturiana recueye temátiques populares, socarrones y amorosiegues, ensin escaecer el quexume pol esmorecimientu de la vida y les costumes tradicionales na aldega. El castellán déxalo pa falar de la mina y los fornos altos como rinxu, ensin refugu, del progresu. Él yera bon exemplu: de neñu aldeanu pasó a mozu mineru y terminó na siderurxa.

Un sofitu fundamental na so vida y na so obra lliteraria atopólu na so muyer, Florina Alías, de la que tevo conocencia arriedor del grupu d'escritores que, dempués la Guerra Civil, ñiciaron na prensa rexonal, con voz sele y pulsiu firme, el nueu alitar de la fala.

En vida espublizó Cancionines d'Asturies, Guía Poética de Mieres, El humor en la lírica del Bable, Xente de Casa, Trabajo y Poesía, y milenta collaboraciones na prensa rexonal, nacional y llatinoamericana. Foi miembru del IDEA, y alantó dellos premios lliteiarios.

Yera un home bonu. Amaba Asturies per enriba de toa medida. Cuando morrió quiso que les sos cenices esnalaren pel valle de Cuna, "onde cortexé dalguna nuechi".

 

                  Luis Antonio Álvarez Alías

Home