María BalbínMaría Balbín
(Caravia la Baxa 1877 - Uviéu 1961)

Obra completa

Por Concha Prieto

María Balbín nació en Caravia la Baxa, el 17 de marzu de 1877. Los sos padres, Mateo (armador de carros) y Josefa (costurera) tuvieron siete fíos, tres neños y cuatro neñes, y nun disponíen de munchos medios económicos. Fue ún de los hermanos, Urbano, emigráu en Cuba, el que mandó dineru pa que María estudiare. Asina fue como cursó los estudios de Maxisteriu n'Uviéu, cumpliéndose los deseos del so hermanu que tantu empeñu punxere pa ver a la familia bien situada. Otres dos hermanes tuvieron tamién qu'emigrar, pero, nesti casu, pa Buenos Aires.

Casose María Balbín n'Uviéu, nel 1911, con Enrique Rodríguez González, profesor de Bellas Artes y extraordinariu tallista. Conociéronse na capital tando el trabayando en Casa del Río, tienda especializada en muebles de talla fino. El matrimoñu tuvo cuatro fíos, dos muyeres y dos homes, pero, pesie a too, ella nunca quixo dexar la profesión que tanto-y prestaba.

Punxo escuela en dellos pueblos asturianos (Cabranes, Lluarca, Cuideiru), hasta que nel 1939 llegó destinada definitivamente pa Uviéu. Toles opiniones de la época confirmen la firme vocación y la capacidá de la escritora pa la docencia. Retiróse de la escuela en 1947, a los 70 años d'edá.

Falleció n'Uviéu en 1961.

Fue una muyer d'una amplia cultura, y con aficiones pictóriques y musicales. La relación más clara que se-y conoz colos intelectuales de la época vincúlala al matrimoñu formáu por Mercedes Valero y Constantino Cabal. Les colaboraciones de María Balbín nel diariu Región correspuéndese xustamente cola época que fue director Cabal, y Mercedes Valero responsable de la sección de Sociedá. Sábese que se teníen una y otra amistá y admiración, y pue ser que tamién coincidieren claramente en delles esmoliciones culturales: les dos escribieron de temática relixoso, y hai noticies de que le dos debieron tener dalguna manifestación pública en favor de la igualdá de los derechos de la muyer: María Balbín, como conferenciante na Escuela de Maxisteriu, trató temes relacionaos col feminismu (Escritoras asturianas del siglo XX, entre el compromiso y la tradición. Pérez-Manso, Elvira María, Principado de Asturias, Consejería de la Juventud, 1991). Pesie a que vivió tiempos políticos  mui distintos y pesie a l'axitada vida social de l'Asturies del sieglu XX, nun se-y conocen manifestaciones al respectu, nin enclín ningún.

María Balbín vive nun períodu de grandes cambios políticos, sociales y económicos: la crisi de la Restauración, la dictadura de Primo de Rivera, la Segunda República, la Guerra Civil y la Dictadura de Francisco Franco, pero nun parez qu'ello quedare reflexao nos sos escritos conservaos, de los que tamién desconocemos la fecha na que se crearon na mayor parte de los casos.

Nesti sen, pue dicise que María Balbín nun ye mui distinta de los sos escritores contemporanios que fixieron la obra n'asturiano, a nun ser delles excepciones. Pero sí podemos dicir que se diferencia de les escritores contemporanies en castellano, tamién asturianes, que sí vivieron la literatura d'una manera más comprometida como Eva Canel o Eugenia Astur, anque tamién ye verdá que les sos circunstancies vitales fueron otres.

La nuestra escritora expresa nel so  facer literario les sos vivencies tomaes de  la cultura tradicional, popular, de la relixión, de la so profesión (maestra) y de la materia primo del so oficiu: los neños, a los qu'adoraba.

Pero convién destacar que nun permanecía ayena a tolos problemes sociales que la arrodiaben: la emigración pa tierres americanes ye un tema recurrente na so poesía y na so prosa, pue ser porque-y tocó vivilo en carne propio.

Temáticamente, nesti contextu históricu que-y tocó vivir a María Balbín, pue dicise qu'hasta la Guerra Civil significó un períodu muertu na so obra. Nun yeren esos temes tremendos los qu'ella quería cantar nos sos poemes, sinon lo que supunxera cotidianidá, familiaridá, temes tan cotidianos y familiares que tenía d'expresalos con un instrumentu tan avezáu comu la llingua materno: l'asturiano, anque tamién escribía na llingua de cultura, en castellano.

Home